Entries by dalmacija moja inspiracija

Vanka je snig i led, mi smo se namirili sa spizon i moremo lipo gledat kakvo je vanka vrime. Ona moja plavuša se uvatila misit tisto za pizzu. Pola čemo danas poist a ostalo gre u duboko. Oveme stolu u kužini je ploča od granita i ka stvorena je za spravjat tisto o'njoki, kolači oli pizza...ta ploča je idealna a i visina je malo nizja o normalnega stola tako da nima bolova u križima. A o'riceti nebi ništa pisa jerbo se ricete mogu pročitat po raznin forumima o'spize. Sam ču van špijat da je duperala moju konšervu o'prošlega lita ta konšerva je tvrda ali ka se razmuti sa maslinovin ujen onda je ludilo. Nam je bilo taman po guštu eto dok se jedna pizza jila druga se još pekla. Na stolu je bocun Merlota i uz spizu je bila servirana dobra čakula i šaka smija. Isto mi je pomalo počelo se penjat na niku stvar ovi led i snig, vrime je da nan bude južina pa da nan se sve ovo raskrabi.

U ona dobra stara vrimena ka smo kompa i ja držali kultnu Konobu u Niskozemskoj bila nan je užanca jedan put misečno počastit se sa janjećin buton...ajde nije uvik bija but manje više je bila potkojenica o'janca a mogu van reć da je i slađa od buta...prije spravjanja but triba bit suv i onda ga u tavi sa svi strane dobro isfrigat da se stisne korica i da sokovi ostanu unutra...koji put triba malo polivat masnoču sa kacijolon, ja duperajen maslinovo uje sa jednon žlicon masla...ka je lipo zarumenija onda ga meknen u jednu škrovadu a nju u banju mariju nek bude obilati 5 litar vode...dodan glavicu češnjaka u kori, grančicu ružmarina i par listova lovora...nek se peče na jakoj vatri ajmo reć 220 gradi i vaja pripazit da ne zagori nek to traje jedno dvi ipo ure, zavisi koliki je but...oni gornji suvi dil koji put malo polivat sa masnočon i nakon sat i po pečenja pokrit sa alu folijon...finalmente ja duperajen termometar kojega zaboden u but a unutra triba bit priko 80 gradi a ka je omekša i dobija rumenu boju onda je gotov...ostavin pokriveno sa alu folijon u ugašenoj pečnici još jedno 20 minuta...višak masnoče odvojin i sačuvan tribat če za drugu spizu...u sokove o'buta ulijen malo, kučarin / dva, nektar kvasine i kontroliran sol i papar...a onu glavicu češnjaka koja se pekla e nju štrukan sa perunon i pomišan sa sokovima o'buta a korice bacin ča, uz to se more jist svašta evo mi smo jili mišane verdure iz pečnice i ove klobuke od gljiva...a ovi antikni aparat u ovoj plavoj škatuli se duperaju kod rizanja buta ovo van je mala morša u koju se zabode i zavida kost o'buta i onda se tranšira e to san vidija kod jednega amika kuvara, eto pa i vi guštajte u temu...i na kraju san se spustija doli ukonobu da izaberen jedno fino vino...bilo nan je taman po guštu...

U našoj familiji je blogerski virus...kod sina, ćere i mene, dok mater samo buba libre...evo smo se vratili sa vijađa, bili smo kod ćere u vižitu, bilo je puno igranja sa unucima i sad nan je ovod u Dalmaciji zasluženi odmor, doma smo di je teplo i di guštamo...prije nego smo išli ča nazad dala nan je ćer ovi libar koji je izdan u Jamerike...ova organizacija se bavi promocijon treniranja mozga protiv bolesti alzheimera i drugi bolesti mozga, oni su na interesantni naćin izdali ti libar...izabrali su pedesetak svjetskih blogera koji su u svojin ricetama pripravili sastojke koji pomažu da bi se mozak aktivira i da bi se usporilo gubjenje pamčenja...ajde ja san to ovako iz ruke napisa možda je najboje da malo guglete...i da daje ne dujin ćer mi je u temu društvu, ne samo da je tu, vengo je fotka njezine ricete na naslovnici...pape je ponosan a kako i neće...davno je to bilo ka je ona diplomirala ka nutricista a za one koji to ne znaju diplomski rad jon je bija obrada moga manuskripta riceta koji san ja spravja u našoj kultnoj Konobi u Niskozemskoj krajen sedandeseti i početkon osandeseti godin onega vika...ah, dobra stara vrimena...bravo mala, boja si od pape ijadu puta...pojubi unuke...a tebi šajemo veliko bačo...