Dalmacija moja inspiracija - dalmatinske konobe # wijnkelders

još malo pa pritakanje vina...

studiokonoba@yahoo.com (dalmacija moja inspiracija) — Wed, 19 Oct 2011 20:46:00 +0200

Đirada po Europi je evo pri kraju prije nego smo išli napravija san vino i meka ga da tiho vrije...za moj Merlot nima problema to je postala rutina ali san zato znatižejan kakvi če mi bit rose...eno ga onod u livoj demejani ona čeka na me...a ove zime če bit i mandarineta i limončela...orahovica je standardna a bermeta jema još dvajstipet litri...ma ko če to sve popit...ali neka uvik je zgodno dat bočicu na poklon...ove zime če bit gušt bit šoto sa malo pršuta i sira, dikod koja maslina, kap uja, dobra ekipa a pašče i pisma...meni draga jednostavnost hedonističkega života...

klub gurmana i hedonista...Kuzmanića kala Split...

studiokonoba@yahoo.com (dalmacija moja inspiracija) — Sun, 25 Sep 2011 17:27:00 +0200

Otkad su novi gastro vitrovi počeli puvat, more se u Splitu na puno lipi mista napravit spiza...ajde nija to spiza ka ča je na pazaru, ma ovod je rić o delicijama koje se pravidu u našoj lipoj Dalmaciji...od vrhunskih vina, osobiti sireva, na suncu sušeni pomidora i balancana, matara, marinirani inčuna, pijani smokava i ostali gastro delicija...ovo je buža di se uvik more vidit i nač čagod novega, ka naprimjer ono vino koje si uvik tražija a nisi ga moga nač... a ako ga nima onda če ga ekipa nač za te...eto, to van je sve u Kuzmanića kali odma kraj Radunice na Lučcu...a za one koji bi tili kušat delicije Klub gurmana i hedonista organizira lipa druženja i to četvrtkon...uz bokunić spize, vrlo dobru kapjicu i malo čakule o spizi i vinima...život je kratak i zato triba guštat...navratite vaš domaćin je Igor Beroš on je poradi nostalgije u ovu kalu tija otvorit ovu puno šesnu butigu jerbo mu je ovod u kali živila njegova draga nona...aha, čutin da se mislite, je pogodili ste pape mu je bija poteštat o'Splita...svitu moj meni je ta buža taman po miri...aj navratite...

jematva 2011...

studiokonoba@yahoo.com (dalmacija moja inspiracija) — Wed, 14 Sep 2011 00:01:00 +0200

Ovo su van svitu najlipji dani u godini...još se uvik banjamo, sušu se smokve, lavuraje su u đardinu...i onda počme jematva... a vrime je ka da ga je niko nacrta...grozje je sazrilo i jema puno sladora e onda je došlo vrime da se pravi vino...ka san grozje smastija iša san mirit koliko jema grožđanega cukra...21 po Babou...biće ludilo o'Merlota...ma niman više ča pisat, evo van litrati pa gledajte...a godina 2010a se taman počela pit...svitu moj pomalo sa vinon da ne bude belaja...mi se držimo ovega, po litre za obid udvoje...a onda koji put vanka škvare ka nan dođu prijateji oli familija...ako ovako nastavimo onda bi mogli i u dubokoj starosti da guštamo u vinu...

tinguleti, vino, verdura, čakule, smij...

studiokonoba@yahoo.com (dalmacija moja inspiracija) — Fri, 24 Jun 2011 09:11:00 +0200

I tako se mi po običaju nađemo da bi mogli bacit čagod u kjun...ovi put ka ono ja san organizira, jerbo san dobija još dva unuka...uh, teško nas je nagovorit...počeli smo sa soparnikom onako s'nogu i sa travaricon u ruku...a onda san evo napravija tingulet o'piletine sa verduron a bija je i tingulet od pileči krila u vareniku pa san in tek docnije reka da je to piletina svi su mislili da je nika divja tica...jerbo je bacalo na tingulet na zeca oli tako ništo...a da bi zadovoija i malo konkrentnije štumike meka san na gradela kobasica i kuvane pancete i ka je bilo gotovo sve zalija maslinovin ujen i posuja sa nasickanin češnjakom i petrisimulom...kruv je bija integralni od susida pekara, po običaju ludilo o'kruva...popilo se pet litri moga merlota i na kraju smo otvorili jednu dobro olađenu botiju o'ledene berbe i to je to...ekipa je išla ča a mene tokaje oprat pijate i ostalo...u nediju gremo sa jahtom na jednodnevnu đitu do Šolte i Krknjaša...vaja dat dobrodošlicu oveme najlipšeme moru i litu na svitu...Dalmatinskome...

jesenji gušti...konoba...

studiokonoba@yahoo.com (dalmacija moja inspiracija) — Sun, 07 Nov 2010 22:48:00 +0100

Ne samo more škoji i žala vengo su ponos Dalmacije konobe i vina...a o prošeku neču ništa pisat, sve znamo...evo me u Primoštenu sad kad više nima furešti i kad je nestalo litnjega šušura lipo je malo lutat po kaletama...popet se do grobja i guštat u panoramskome pogledu...a vino, navratite u Primošten kušajte Babića...otvoreno je par konoba a ove bačve su van kod Jozefe ona van samo prodaje vino i prošek...sidi se na daskama koje su na bloketima a njena težačka ruka van ulije vino kojega je sama odnjegovala uh, veli su to trudi...Babić jon je sa Bucavca i tamo se mora lavurat na ruke, težak je to život...ovu konobu bi Primošten triba zaštitit ka lokalni brand...jednostavnost je vrlina a to je kod nas ritko kad bilo pripoznato...a ova Stara kuća van je u blizini Jozefe ovod se more užinavat...uostalome sami otkrijte čari ovega šesnega mista...

jesenji gušti...rakija...

studiokonoba@yahoo.com (dalmacija moja inspiracija) — Tue, 02 Nov 2010 12:01:00 +0100

uvik san reka da je ovo vrime najlipji dil godine...nakon babjega lita bilo je još malo točavanja i onda je došlo vrime da se vade sudi i pripremaju za jematvu...nakon jematve, spravjanja i zrijanja vina je doša red i na pečenje rakije...skupi se ekipa oko kotla i svak ispeče svoje, niko uvati manje niko više...pa onda stalno kušavanje, ola če ti je dobra ove godine a uvik se nađe i koja suva smokva oli mendula...a ja san ove godine uvatija desatak litri loze, čiste ka suze...gradacija je 40 %...a evo san ubra i smričke gori u brdu a sa Šolte san od sestra dobija rogača za rogačušu...još me čeka branje maslina ali o temu drugi put...ma reka san van, jesenji gušti sono šekondi...a sad povirite doli kako to izgleda...

babje lito...unuka i prošek...

studiokonoba@yahoo.com (dalmacija moja inspiracija) — Sun, 26 Sep 2010 20:31:00 +0200

na odrini nan je grozje lipo rodilo, dosad smo ga onako iz ruke jili ali san ove godine odlučija da napravin prošek...eto, svaka pomoč je dobro došla tako da je i unuka dala ruke...pardon noge...eno soka od grozja doli u konobi a biče prošeka jedno tridesetak litri...

jematva 2009...

studiokonoba@yahoo.com (dalmacija moja inspiracija) — Wed, 23 Sep 2009 09:23:00 +0200

svitu moj ovo van je najlipje vrime u godini...zvizdan je popustija ali je još teplo a dani su se skratili...grozje je sazrilo i vrime je o jematve...a počele su i lignje...nezna čovik di bi prije...ali prvo vaja sredit vino...ja van pravin Planac to van je coupage od merlota i vranca...jema več puno godin da grozje kupujen kod vinogradara Pere iz malega mista iza Biokova Otrić - Seoci u Pojezerju...ka je grozje došlo u konobu jemalo je 19 gradi cukra...petejke su odma odvojene i nakon nikoga vrimena je počelo kuvanje...evo moran drop ladit bocam sa ledon...jema malo fibre...pa triba kalat fibru...još par dan pa ču ga pritočit da bi onda nastavija lagano vrit...svake godine je mala nervoza kako če vino bit, boje nego lani oli če pinkicu podbacit...mi još pijemo berbu 2007 a 2008 če na red doč poza Nove godine i tako smo uvatili ti ritam da nan uvik jedna godina odleže...a pripremen i lipu etiketu, evo je prošla sve komentare u familiji i na promaliče čemo je počet duperavat i obečajen da ču je meknit ovod...kažu da je u vinu istina...bar da jema čagod u ča čovik more virovat...

kaštelanski vinari...i kušavanje...

studiokonoba@yahoo.com (dalmacija moja inspiracija) — Thu, 27 Aug 2009 12:20:00 +0200

Lani san ima obaveza tako da nisan moga bit u Kambelovcu na prvoj fešti vinara iz Kaštela. Ali san ove godine od gušta sve refa. Kad smo došli na Cambijevu pjacetu dobija san pravi dojam, svitu moj ovod triban bit, ovo je ono. Ideja da se kupi čaša sa boršinon je prava, praktična je i ostaje ti lipi suvenir.

Nakon đirade po pjaceti bija je red da se čagod i kuša. Sa crnin vinima nismo imali problema ali su zato opoli i bila vina bili malo problematični za kušavanje. Kod jednih je vino bilo mrzlo jerbo su ga držali na ledu a kod drugih je bilo teplo. Tako da su u startu svi vinari bili u neravnopravnemu položaju. Možda bi za slijedeču godinu bilo dobro organizirat kušavanje na slipo, prostrit jedan veli stol nasri pjacete i vina kušavat koja su sva u istin bocama i označena samo sa brojevima...i tu meknit jedno 4 do 5 veliki šterika za ocjenu boje i bistrine...onda dvi tri pijadele sa bokuničima kruva a inčune i sir ne mečat. A vajalo bi pripremit i nikoliko siča da se vino more da mi prostite na ričima ispjuvat. Ovako kako je sad bilo nije bilo objektivno ocjenjivanje.

Meni i mojoj bojoj polovici je opol od Ivana Kovača - Matele bija vrhunski, lipa boja, tanina pinkicu, puna justa, ajmo reč da je ti opol bija tako dobar da bi se i Francuzi iza uva počešali da su ga kušali. Crljenak Ivice Radunića je bilo lipo izneneđenje, Crljenak je kad ga usporedin sa Zinfandelima koje san dosad pija puno obečavajuči još če proč vrimena dok se ne stvori harmonija, vidit čemo kako če se razvijat, ma baš san se u zanje vrime pita kako stoji sa Crljenkom koliko san moga peškat neče ga bit puno. Rožalin od vinara Vlade Perišina je ugodno otkriče, ma taman za lipi osobiti poklon.

Neznan koliko su Kaštelani upučeni u zakone EU ali to van ugrubo izgleda ovako, svaka nova članica EU donosi u dotu onoliko hektara vinograda koliko i u momentu kad postane član EU jema posađeno, kasnije se mogu vinogradi samo obnavjet ali novi se ne smiju sadit. Ovo važi za vinogradare koji se profesionelno bave tin poslon. Za osobne potriba neznan, koliko če se naši političari potrudit i to bude zaštičeno, e to bumo videli. Zato je sad bitno da se ča više površina zasadi sa vinovon lozon. Triba sadit Crljenak jerbo je brand Zinfandel tako poznat pa se sa dobron marketinškon kanpanjon more Crljenak, Kaštela i Zinfandel lipo prizentirat u EU a da ne govorin u SAD jerbo su Jamerikanci ludi za svin di se more dil njiove povjesti isplest sa Europskom.

Dragi moji Kaštelani vodite računa da če vas bogati Rvacki vinari prinit žedne priko vode. Onda ovako, prvi Crljenak prispije na Makarskoj Rivijeri a onda na Hvaru a bit če ga na još više mista. Ma vi moret trubit da je on autohtoni i da je DNK analiza bila u Kaštilima ali marketing je ništo drugo. Zato je vrime prispilo da se udružite i da na ča više površina zasadite Crljenak, nadaje nebi bilo loše da se date na investiciju gradnje jedne moderne vinarije di bi se Crljenak crni i Crljenak opol odnjegova i pod zajedničkin logotipon donija na tržište. Zaboravite na konobe veličine 3 do 4,5,6 ijade boca ja san toliko vina prodava, naravno uz spizu, u mojoj Konobi u Nizozemskoj na godinu dan.

Triba sist za stol i dogovorit se, ima da se sve do Kozjačkoga kamenjara zeleni od loze. Klima je prava, zemja je čista, Crljenak se ovod rodija, Zinfandel ka brand je priznat u svitu, znanje je prisutno, a tržište van je prid noson...nima čekanja. I dajte konačno pokrenite inicijativu da se na ulazima u Kaštela ajmo redom Plano, magistrala, Zračna luka, Malačka, Solin, Marina Kaštela meknu veliki panoi di bi naprimjer pisalo Zinfandel...born in Kaštela oli temu ništo slično, brand Zinfandel je tako poznat da ga se stalno triba spominjat sa Crljenkom i Kaštelima.

Sad bi malo o etiketama ka prvo skidan kapu vinaru Vuini izvrstan logotip kojega dupera na svaku botiju, tako i triba. A bilo je i etiketa koje su navrnuti meštri priko konpjutera napravili, ma tako se ne lavura. Uostalemu zakon propisuje ča sve mora bit na etiketi. I na kraju nebi bilo loše da se priporuči dreskod...jerbo i je tu večer bilo puno u kratke gače i japanke ma razumin je da je lito ali da je barenko obučena maica ali eto na pjaceti je je pa ko in more zabranit.