Dalmacija moja inspiracija - Dalmatian Slow food life...The Taste of Dalmatia # gastronomy

mandarineto...

studiokonoba@yahoo.com (dalmacija moja inspiracija) — Sun, 20 May 2012 00:01:00 +0200

Ove smo zime deboto svaki dan štrukavali naše neprskane mandarine, nakon štrukavanja san korice skupja i meča u duboko. Ka se skupilo dva kila onda san sve stavija u ovi karamički lonac sa poklopcen, sve san dobro poslaga i prilija sa lozovačon...

To je doli u konobi stalo jedno četiri miseca i sa je došlo vrime da se procidi i mekne u botije. Prvo je sve išlo kroz sito a docnije kroz kartu koju duperajemo u kužini.

Sa ka je sve prociđeno tribalo bi i kušat, ma meni je da van pravo rečen taman po guštu a na bazi ovega se more napravit i liker ali o temu drugi put. Eto ga na, bibita je na pritek samo triba bit umjeren i onda nima problema.

Jedna boca gre doma u kuću a druge dvi doli u konobu za degustiranje...

listolimuneto...

studiokonoba@yahoo.com (dalmacija moja inspiracija) — Wed, 16 May 2012 21:02:00 +0200

Evo san skida lišče sa limuna to van je ono koje nareste doli na deblu...onda mi sine ideja ma zašto bi ja to baca na kompost kad se more duperat za lipu bibitu. Ajde bar mi se tako pari da če bit lipa bibita. Jerbo lišče o'limuna jema tako lipi vonj da ga je grijota bacit ča. Onda ajmo na posal.

Jema san doli u konobi još pet litri lozovače i računan ajde da napravin novu bibitu i tako je bilo eto san je nazva Listolimuneto. Naši limuni ka i ostali agrumi se nikad ne prskaju tako da su zdravi i brez ikakve kemije. U ove dvi caklenke san napunija do vrja lišče i onda u svaku bocu doda po kvarat kila cukra, nalija san u svaku caklenku okolo 2 litre lozovače gori meka po jedan cvit i po jedan pup od limunova cvita doda plastiku i veza je sa laštrikon. Eno i vanka nek se niko vrime griju na suncu. Ma baš me interesira kakva če to bibita postat.

počeli su gušti u litnjoj kužini...

studiokonoba@yahoo.com (dalmacija moja inspiracija) — Sun, 13 May 2012 19:30:00 +0200

Malo pomalo se približavamo litu red lipi dana pa red dan sa malo kišice a priroda nan to vrača na najboji naćin, svudi je cviće tako da ga mi svaki drugi dan beremo za vrime naši jutarnji điradi po okolnin brdima i pojima...nakon lavuranja u vrtlu i rizanja pusti ružmarina Ona mi reča da bi bija red da se vazme koji aperitiv i da meknen bocun bilega da se ladi...danas smo jili ovi rižot Ona ga je spravjal a ja san ubra matovilca i rukole i nalija bibite...i tako nan gredu ovi dani ka ča je i vrime...malo lavure pa malo ladanja...eto van ga na i ovi dan deboto je proša...

bob i manistra...

studiokonoba@yahoo.com (dalmacija moja inspiracija) — Wed, 09 May 2012 21:29:00 +0200

Stađun je od boba ovi put čemo ga jist sa talijatelama od dvi kolure...bob san očistija, u teču san navisija malo vode i doda nasickenega selena, malo soli i papra pa zalija obilato sa maslinovin ujen...ka je počelo kuvat doda san bob, nakon ča je bob skuvan izvadin ga vanka i u onu vodu skuvan manistru...napose san na uju šufiga izrizanu suvu pomu, na sitno češnjaka i na male bokuniče mladu kapulicu...bob manistru i ono šufigano pomišan i dodan obilato gratanega tvrdega sira...salata je iz vrtla a svinjski filet je isfrigan na naglo...pili smo Merlot 2010e...eto van ga na bob sa manistron...daste mi dobro i beričetno...

ovo Ona pravi samo tako...

studiokonoba@yahoo.com (dalmacija moja inspiracija) — Thu, 03 May 2012 15:11:00 +0200

Za ovu spizu me morete probudit u sri noći jerbo je već godinan volin jist. Kuvana pašta, frigano mliveno janječe meso, špinjača na sitno, kuvano jaje u po meko...onda ovako, meso frigat i začinit onako kako van najboje odgovara. Ona doda malo šufigane kapule, češnjaka, kučarin konšerve, par grančica friškega timijana na sitno, soli i papra...

Špinjaču skuvat na brzinu i dobro je ocidit još boje dobro pritisnit da jon voda izađe vanka, prvo se poreda manistra, pa meso sa kapulon i ostalin, onda špinjača, pa jaje na fete i na kraju nagratat sira...sve to gre u ugrijanu pečnicu i nakon desetak minuti počimaju gušti...ovi put smo pili ovo vina sa Pelješca...da van pravo kažen ništa posebno eto tribali smo ga duperat, a ono na dnu čaše je bij suvenir,... ajme...nima veze jema dana kad je vino,...onako...

šparoge, divje zeje i ostalo...

studiokonoba@yahoo.com (dalmacija moja inspiracija) — Sat, 28 Apr 2012 22:46:00 +0200

Evo je granilo sunce i vrime je da se poide čagod zelenega iz našega vrtla. Kofa je u ruku i počelo je čeprkanje ispod maslina, ka san ubra zeje doda san još par lista blitve, pa malo andivije a naša san i mladi listi od cikle.

Šparoge i nikoliko bljušta san ubra za vrime jutarnje đirade po okolnin brdima. Ovi put san pofriga kunpire na sitno i priko nji meka šparoge a nji san samo dva puta okrenija.

Divji i pitomi češnjak san zajedno sa timijanon i sa dva lista friškega i jednin liston suvega lovora malo isfriga i zalija sa našin merloton i doda kučarin cukra i na kraju par kapi nektar kvasine...još san iskriža još malo kapule i karote. Zeje san skuva na brzinu i zalija sa maslinovin ujen.

Goveđi tournedos san isfriga na maslinovu uju sa bokuničen masla. Priko mesa san meka citronele i koromača koji san prvo malo okrenija u tavi. Vino za pit je bija niki viški plavac. Ma ništa posebnega tako da smo po botije ostavili za kuvanje a nastavili sa našin merloton.

đirada, litravanje i šparoge...

studiokonoba@yahoo.com (dalmacija moja inspiracija) — Wed, 25 Apr 2012 10:04:00 +0200

Ovo su mi najlipša vrimena, priroda se probudila nakon onega leda i sniga i sve blagodati ovega dila svita su mi na dohvat ruke...cviće, mediteranske trave, dalmatinski kamenjar i njezina Visost Šparoga...volimo je jist na puno načina a ne samo trdicionalno sa jajima, eto ja van volin malo pravit monade u kužini...sad nek budu ovod samo ovi litrati a o ricetama ču drugi put...

lagani obid...

studiokonoba@yahoo.com (dalmacija moja inspiracija) — Thu, 19 Apr 2012 00:20:00 +0200

Juva je bila samo taka,ovi lipi bokuniči govedine u juvi su nan lipo legli. Od tega se more napravit fini bouillon uz malo karote i na sitno rizanoga zelenilo o'kapule. To nan je bilo za početak. A kasnije smo poili bokunič bifteka koji je bija frigan i zaliven sa pinkicu ovega Španjolskega vina. Bilo je domači njoki, gratanega sira sa malo karote ča je ostalo od juve. Lagane čakule o svemu i ničemu su nan ulipšale dan, eto ka si deboto penšjunat onda pišeš ovake pizdarije na blogu. Ajde daste mi dobro i beričetno nama je bilo super.

konoba duga...oaza spize i divote...

studiokonoba@yahoo.com (dalmacija moja inspiracija) — Thu, 05 Apr 2012 21:22:00 +0200

Evo san obeča amiku Đangu da ču navratit prije otvorenja da napravin par litrati i da popijemo koju botiju vina...taman ka san doša firma iz Marofa koja mu je instalirala solar je obidvavala i spremala se na put prima doma. Đango je sad siguran da jema puno energije, sa solara če je bit napritek a u rezervi jema i dva agregata. Nije lako vodit konobu onamo di nima letrike i vodovoda...ali sa današnjon tehnikon se sve more, je da je investicija velika ali če se to ipak brzo isplatit. Jerbo se ovod ji friška riba iz mora, vredura je sa škoje, letrika je od sunca ma di češ boje i ekološkije...maslinevo uje je sa Đangovi maslin...a to su gosti pripoznali i uvik se vračaju nazad. I tako nan dolazi nova turistička sezona, svitu moj ove zime se puno lavuralo i sve je okolo Duge sređeno tako da gosti mogu guštat samo tako...novitada je da je uz more Đango meka stupe sa štednin žarujam tako da če bit pravi gušt nakon večere prošetat se uz more. Mi smo lipo obidvali, Đango je otvorija ovu botiju chardonneya ma ludiilo od vina...a Snježa je napravila lipe polpete i pašticadu ajme, bilo je tu i pena rigatta i njoki i domačega kruva...jedno lipo popodne i svitu moj u subotu se Duga otvara i bi če to još jedna gastro sezona di če se jist, pit, banjat i guštat...namojte svi navalit u isto vrime pomalo ka van se potrefi zaletite se ovo van je oaza gušta, spize, banjanja i ladanja...i divote...

fritada o'šparog...

studiokonoba@yahoo.com (dalmacija moja inspiracija) — Sun, 01 Apr 2012 11:43:00 +0200

Uvik san volija promaliće jerbo sve cvita i buja, po đardinu su kosevi, faganeli, crvandači a i blavori su se probudili. Pravo vrime za poist jednu lipu fritadu o'šparog, u nas je tradicija da se prva fritada ji o'šparog iz našega đardina i vrtla. A docnije se điraje po okolnin brdima i beru one još divjije.

Ja moju fritadu radin ovako okinen vrje i meknen i sa strane. Ostalo, dok ne počme bit tvrdo eto to do tvrdega, izrižen na sitne bokuniče...zamutin šest jaja, dodan skoro po deca mlika, jedno po deca maslineva uja, one sitne bokuniče šparoga, selenova lista na grezo jedno pet - šest lističa, sol, papra i na sitno češnjaka sve dobro razmutin i u jednu teču dodan maslineva uja dobro ugrijen na špakeru i sve u tu teču izlijen. Nagratan sterega sira i poredan onako nonšalantno one vrje šparoga. U dobro ugrijenu pečnicu na 200 gradi ostavin tu teču da se razmučena jaja stisnu i da fritada počme malo rumenit.

Ona i ja smo pili lipo olađeno bilo iz desnega suda doli u konobi a uz to je bilo divjega zeja a uje je naše da se razumimo maslinevo o'oblice i sad nek mi niko reće da nan je život bezveze ma di bezveze ovo van je Dalmatian slow life...