Dalmacija moja inspiracija - Dalmatian Slow food life...The Taste of Dalmatia # gastronomy

njezina pizza...to vaja provat...

studiokonoba@yahoo.com (dalmacija moja inspiracija) — Fri, 10 Feb 2012 18:18:00 +0100

Vanka je snig i led, mi smo se namirili sa spizon i moremo lipo gledat kakvo je vanka vrime. Ona moja plavuša se uvatila misit tisto za pizzu. Pola čemo danas poist a ostalo gre u duboko. Oveme stolu u kužini je ploča od granita i ka stvorena je za spravjat tisto o'njoki, kolači oli pizza...ta ploča je idealna a i visina je malo nizja o normalnega stola tako da nima bolova u križima. A o'riceti nebi ništa pisa jerbo se ricete mogu pročitat po raznin forumima o'spize. Sam ču van špijat da je duperala moju konšervu o'prošlega lita ta konšerva je tvrda ali ka se razmuti sa maslinovin ujen onda je ludilo. Nam je bilo taman po guštu eto dok se jedna pizza jila druga se još pekla. Na stolu je bocun Merlota i uz spizu je bila servirana dobra čakula i šaka smija. Isto mi je pomalo počelo se penjat na niku stvar ovi led i snig, vrime je da nan bude južina pa da nan se sve ovo raskrabi.

janjeći but...uh,...

studiokonoba@yahoo.com (dalmacija moja inspiracija) — Tue, 07 Feb 2012 00:01:00 +0100

U ona dobra stara vrimena ka smo kompa i ja držali kultnu Konobu u Niskozemskoj bila nan je užanca jedan put misečno počastit se sa janjećin buton...ajde nije uvik bija but manje više je bila potkojenica o'janca a mogu van reć da je i slađa od buta...prije spravjanja but triba bit suv i onda ga u tavi sa svi strane dobro isfrigat da se stisne korica i da sokovi ostanu unutra...koji put triba malo polivat masnoču sa kacijolon, ja duperajen maslinovo uje sa jednon žlicon masla...ka je lipo zarumenija onda ga meknen u jednu škrovadu a nju u banju mariju nek bude obilati 5 litar vode...dodan glavicu češnjaka u kori, grančicu ružmarina i par listova lovora...nek se peče na jakoj vatri ajmo reć 220 gradi i vaja pripazit da ne zagori nek to traje jedno dvi ipo ure, zavisi koliki je but...oni gornji suvi dil koji put malo polivat sa masnočon i nakon sat i po pečenja pokrit sa alu folijon...finalmente ja duperajen termometar kojega zaboden u but a unutra triba bit priko 80 gradi a ka je omekša i dobija rumenu boju onda je gotov...ostavin pokriveno sa alu folijon u ugašenoj pečnici još jedno 20 minuta...višak masnoče odvojin i sačuvan tribat če za drugu spizu...u sokove o'buta ulijen malo, kučarin / dva, nektar kvasine i kontroliran sol i papar...a onu glavicu češnjaka koja se pekla e nju štrukan sa perunon i pomišan sa sokovima o'buta a korice bacin ča, uz to se more jist svašta evo mi smo jili mišane verdure iz pečnice i ove klobuke od gljiva...a ovi antikni aparat u ovoj plavoj škatuli se duperaju kod rizanja buta ovo van je mala morša u koju se zabode i zavida kost o'buta i onda se tranšira e to san vidija kod jednega amika kuvara, eto pa i vi guštajte u temu...i na kraju san se spustija doli ukonobu da izaberen jedno fino vino...bilo nan je taman po guštu...

lagani obid...

studiokonoba@yahoo.com (dalmacija moja inspiracija) — Mon, 09 Jan 2012 22:22:00 +0100

Malo pomalo smo počeli minjat i ovu Novu godinu puno svita če brzo zaboravit onu Staru ma triba gledat naprid...nova Vlada ne obečaje puno a to mi je dobar znak, sve zavisi kako se gleda, dok ja ovod pišen o lipoj spizi u nas jema puno svita kojemu je život težak da se razumimo nije meni grižnja savjesti ali bi ipak volija ka bi puku bilo boje a ne samo njima...

a mi smo lagano obidvali...Ona je okinila glave o'ribe i napravila juvu za lizat prste a prije nego je meknut angriz u kuvanu juvu smo mekli sirovu ribu jušto pet minuti i onda ostavili na teplu poklopjenu terinu...šaka napose kuvanega angriza se doda u juvu samo da se ogrije i onda moremo počet jist...kruv je Ona ispekla malo smo ga polili sa ujen češnjakom i nasickanin selenom a bilo vino je iz suda od sto litri sasvin desno doli u konobi, malo smo ga oladili da boje klizi...blitva je brez kunpiri samo sol, papar i maslinovo uje...

lipi obid u našoj kužini a kasnije čemo malo poć protegnit noge do brda nek se prvo ovo vino malo slegne...;-)

u vrtlu je svega pomalo...

studiokonoba@yahoo.com (dalmacija moja inspiracija) — Tue, 20 Dec 2011 21:07:00 +0100

Evo ulazimo u zimu bar je tako kalendarski, a i zaladilo je, okolo kuće je manje lavure, skupja san otpalo lišče i ka šušanj ga stavija ispod cabal da pokrije zemju i da se zemja malo smiri, ma nek se milijuni mali beštija zaštite od mraza i da na promaliče mogu jopet pomagat da se uspostavi bioraznolika ravnoteža u vrtlu...

ostavija san još ništo maslina na cablima da dobro sazriju i da se masline smežuraju a ka dođe vrime meknit ču ovod ricetu priprave...naranče su deboto zrile šipke smo već poili a ogušta smo i štrukavali, ma ludilo...

blitve i selena je napritek a češnjaka i kapule san puno posadija...prisadije san i artičoke sad i je u vrtlu priko dvadeset a ove male papričice su pikantne, ka sazriju nji osušin i u peštaduru smrvin...susid mi je da par prisadnica od pelina dobro če doć ka buden pravija gorke likere...

kumquat mi ja da amiko a moran i ja nabavit jedno cablo od njega se more pravit puno lipi riceta...mandarine čemo uskoro ubrat skuvat i pa napravit lipu kašu i to gre u duboko, u svaku vričicu po 250 grama to nan je mira za napravit lipi kolač...i na kraju cile lavure zaslužena kavica u zimskeme vrtlu...

još uvik se obidvaje vanka u litnjoj kužini...

studiokonoba@yahoo.com (dalmacija moja inspiracija) — Thu, 15 Dec 2011 00:01:00 +0100

Ove godine je vrime samo tako jesen ka da nije bila još malo pa počima i zima ali eto od zime nima još ništa, tratinčice su u vrtlu, ružmarin je u cvatu a i nešpula je ka i svake godine u cvatu.

Deboto svaki dan sa mojon jubavnicon obidvajen vanka a u litnjoj kužini je ugodna fibra, sunce tuče u glavu tako da se komodna sidi u kratkin rukavima.

Danas je Ona pravila njoke i ispekla but o'tuke u vrtlu jema mlade salate, friško da ne more bit friškije...vino je iz desnega suda godina je 2010ta lipi pitki Merlot...eto...prognoza je da če se vrime prominit onda tribamo još malo guštat...

bibite i ostalo...za lipe gušte...

studiokonoba@yahoo.com (dalmacija moja inspiracija) — Thu, 08 Dec 2011 17:47:00 +0100

Još malo pa je finila i ova ali prije nego je počmemo minjat triban napravit malo bibita i ostalega...pod ostalo je ono ča san več napravija na kraj lita a to su sušene pomidore na suncu, isto tako i balancane, pa onda pijane smokve i matar to sve je već u maškaduru...sa je red doša na masline u salamuri...a tek maginje, smričke i divje kruške...svo se to lagano točaje u lozovači i vata zanje sunce da pusti ono svoje tako pripoznatjivo za naše podnebje u Dalmaciji a te če nan bibite bit sičanje na lito i na lipe gastro gušte...još moran sredit mandarineto eno su kore o'mandarine na točavanju a tamo nidi krajen prvega ču ga napravit...eto, da se nikako izdržat uskoro su ovod nove radne pobjede...

jesenji gušti...biškoti o'medule i malo mandarineta...

studiokonoba@yahoo.com (dalmacija moja inspiracija) — Wed, 07 Dec 2011 00:01:00 +0100

Da bi se guštalo u životu ne triba nan puno tega, ugodna šetnja do mora, doživit lipi zalazak sunca i onda se vratit doma pa uz laganu mužiku kušat malo biškoti o'mendula sa mandarineton...Ona je ispekla biškote a ja san napravija mandarineto...biškot se lagano umoči u mandarineto i onda se onako mokro ji...ma ludilo svitu moj, eto nakon ovega sa izborima i nakon minjanja Vlade samo tribamo poželit da če puku život bit malo laški i da čemo se finalmente uvatit lavure i bit ravnopravan dil naprednega svita...eto malo san se odalečija od teme ma svitu moj ajte malo u prirodu oslobodite se pritiska i napunite baterije...

homemade maslinovo uje...noćnjak...

studiokonoba@yahoo.com (dalmacija moja inspiracija) — Wed, 30 Nov 2011 18:38:00 +0100

Zove me amiko i kaže, ma daj navrati gremo gori u brdo do sela naša san kod jednega čovika staru prešu za vino pa bi je donija doma i priuredija za prešanje maslina. Ne triba mi dva put reć i mi se vozimo prima gori pa sve ukrcamo u mali kamionet...a preša je teška jemala je kapacitet 450 kili grozja...

amiko je inače izumitej on svakega vraga zna napravit a drugi amiko je veliki meštar o metala tako da je u firmi napravija ova dva cilindra sa bužama... ispilali smo nikoliko murala na prikladne bokuniće to nan triba za pritiskanje...staru muljaču za grozje smo malo prigradili da se mogu mlit masline i to van je to...a ja san naša ništo rostvraj suđa, pripremija sita i filtere pa smo mogli počet...

prvo smo masline mlili kroz muljaču za grozje tu nan je bilo problema jerbo su crne se odma speštale ali zelene su ostale prikinute po pola...onda smo te zelene štrukavali sa bokun drveta dok se nije napravila lipa pašta...a ka to nije bilo po miri onda smo mlili još jedan put...paštu bi ostavili cilu noć da se malo masline oksidiraju...

drugi dan prvo se dobro miša pa sve gre u prešu i onda počima lagano pritiskanje...u prešu je najboja mira 60 kili mliveni maslina...nikakva vruča voda samo pritiskanje pa ča izađe nek izađe...dnevno se pritisne jedna preša i pripremi pašta od maslina za drugi dan...tako da amiko radi svoj posal oko kuće i onda po koji put malo pritisne manicu od preše i sila onda radi svoje...i još ništo, košpica je ostala cila tako da će ovo uje bit stvarno specijalno...

od deboto 60 kili maslina san iz cuga izvuka 3ipo litre uja...a 10 litri ociđene vode sa ujen i talogon san ostavija da se napose taloži i to ču ubrat nakon tega ciđenja...računan da če bit još jedna obilata litra...ovo je bila prva godina, dogodine znamo ča nas čeka, tribamo napravit nike pripravke a najvažnije je da se masline dobro sameju i promišaju...separacija če ostat ista ona je samo na prirodneme taloženju...je da je prinos manji ali zato nima troškova koje bi ujara na centrifugu tražila za prešanje tako da smo financijski čak i u dobitku...

a pulpu čemo sušit i od nje pravit brikete za kamin, za sve ovo triba pacijenca i vrime...najglavnije je da preša ladna da ladnije ne more bit i da se sve radi na ruke...umočija san prst u uje i počeja guštat...to van je svitu moj originalni noćnjak...nek se malo smiri i razbistri...ovo je likarija samo za vrhunske bokune spize...

stari dvor...kaštel stari ugodno misto o'guštanja...

studiokonoba@yahoo.com (dalmacija moja inspiracija) — Sun, 27 Nov 2011 20:33:00 +0100

Ma nebi ovod pisa u temu da je prije turizam bija boji i da je bilo više furešti to je tako bilo i vaja se okrenit budučnosti, ja bi se ošerva na današnje vrime, eto u Novome se vididu konture novega otele i to na oneme mistu di je bila vinarija, ma jeman špurju da če ovi otel bit motor zamašnjak koji če pokrenit i druge investicije...a i grad bi triba sve to pratit i pripoznat napore investitora pa napravit kaštelanska mista po miri našega čovika i po miri naši gostiju...mi dvoje smo se ove nedije malo prošetali kroz Kaštela, svitu moj ovake idile i ugođaje nima nidi na Jadranu a ovako dugi lungo mare jema samo Opatijska rivijera ali mi se ipak pari da je naš Kaštelanski lungo mare duži i pitomiji...ma nek su u Opatiji njezine vile mi jemamo naše kamene vile a nađe se i šesni oni pravi vila...u jedno lipoj vili u Starome je otvorena konoba Stari dvor... ma konoba ne more bit na bojeme mistu, zapadno prima selu jema nikoliko kafiča, butiga, đardin i lipa plaža, okolo judi fitavaju apartmane, istočnije je nažalost još uvik zatvoreni otel Palace...a isprid su plaže, zapadno in je ka prvi susid kamping...stvarno idealno misto za konobu...na teraci ti zastaje dah o lipega pogleda, još ka bi se grad pobrinija da isprid nima parkirenja onda bi bilo idealno misto za popit kavu, poist bokun mesa oli ribe i sve zalit žmulon vina...povirija san u kužinu i evo van na litratu kako se spravja pizza u originalnoj krušnoj peći, kako i mirita...divin se ovin judima koji su se uvatili ove lavure, virujte mi nije in lako, ali ja san siguran da se turizam pomalo vrača u Kaštela...mišjenja san da ne triba u Kaštelima puno minjat...sva srića da se nismo unakazili ka druga turistička mista, ma ovod sve odiše načinon života 60i godin onega vika a to je ono ča dobro platežni gosti vole, uteč od modernega života i vratit se u mala jednostavna mista i u miru pročitat one knjige koje su tili odavna pročitat...u Kaštelima ka prvo triba sredit kanalizaciju, onda zabranit liti vožnju auti uz more u popodnevne i večernje ure, vaja posadit puno cvića, piturat kuće, sredit okućnice...sve se to more ako se oće, pa malo dricat rive i dat šansu mlademe svitu da brez puno problema moredu otvorit raznorazne uslužne obrte kojima bi se turizam obogatija...još ka bi se u Kaštela doselilo jedno dvisto do tristo penšjunata iz EU-e oli sa kontinentalne Domovine, onda bi bilo šušura po cilu godinu...a Stari dvor je na kraju ove štorije lipo misto za doč i guštat...želin in sve najboje...dočemo jopet...

skupija san sime...

studiokonoba@yahoo.com (dalmacija moja inspiracija) — Tue, 22 Nov 2011 20:35:00 +0100

Život na selu je prava divota...u ova vrimena ka je sve digitalizirano i ka nima problema bit u kontaktu sa sviton najlipše je bit na čisten zraku i uživat u blagodatima prirode. Masline, verdura, grozje, agrumi sve je nadohvat ruke a ka temu dodan mediteransko bilje okolo kuće onda me morete razumit da ovod guštan. Svake godine ostavin za sime razne verdure i sušin dalmatinske začinske trave. Lipa zanimancija eto, znan ča jiden i sa čin pripravjan spizu. Sad vaja sredit mendule i sve ostalo meknit u caklenke.

http://www.slobodnadalmacija.hr/Mozaik/tabid/80/articleType/ArticleView/articleId/155938/Default.aspx