Dalmacija moja inspiracija

listolimuneto...

studiokonoba@yahoo.com (dalmacija moja inspiracija) — Wed, 16 May 2012 21:02:00 +0200

Evo san skida lišče sa limuna to van je ono koje nareste doli na deblu...onda mi sine ideja ma zašto bi ja to baca na kompost kad se more duperat za lipu bibitu. Ajde bar mi se tako pari da če bit lipa bibita. Jerbo lišče o'limuna jema tako lipi vonj da ga je grijota bacit ča. Onda ajmo na posal.

Jema san doli u konobi još pet litri lozovače i računan ajde da napravin novu bibitu i tako je bilo eto san je nazva Listolimuneto. Naši limuni ka i ostali agrumi se nikad ne prskaju tako da su zdravi i brez ikakve kemije. U ove dvi caklenke san napunija do vrja lišče i onda u svaku bocu doda po kvarat kila cukra, nalija san u svaku caklenku okolo 2 litre lozovače gori meka po jedan cvit i po jedan pup od limunova cvita doda plastiku i veza je sa laštrikon. Eno i vanka nek se niko vrime griju na suncu. Ma baš me interesira kakva če to bibita postat.

počeli su gušti u litnjoj kužini...

studiokonoba@yahoo.com (dalmacija moja inspiracija) — Sun, 13 May 2012 19:30:00 +0200

Malo pomalo se približavamo litu red lipi dana pa red dan sa malo kišice a priroda nan to vrača na najboji naćin, svudi je cviće tako da ga mi svaki drugi dan beremo za vrime naši jutarnji điradi po okolnin brdima i pojima...nakon lavuranja u vrtlu i rizanja pusti ružmarina Ona mi reča da bi bija red da se vazme koji aperitiv i da meknen bocun bilega da se ladi...danas smo jili ovi rižot Ona ga je spravjal a ja san ubra matovilca i rukole i nalija bibite...i tako nan gredu ovi dani ka ča je i vrime...malo lavure pa malo ladanja...eto van ga na i ovi dan deboto je proša...

bob i manistra...

studiokonoba@yahoo.com (dalmacija moja inspiracija) — Wed, 09 May 2012 21:29:00 +0200

Stađun je od boba ovi put čemo ga jist sa talijatelama od dvi kolure...bob san očistija, u teču san navisija malo vode i doda nasickenega selena, malo soli i papra pa zalija obilato sa maslinovin ujen...ka je počelo kuvat doda san bob, nakon ča je bob skuvan izvadin ga vanka i u onu vodu skuvan manistru...napose san na uju šufiga izrizanu suvu pomu, na sitno češnjaka i na male bokuniče mladu kapulicu...bob manistru i ono šufigano pomišan i dodan obilato gratanega tvrdega sira...salata je iz vrtla a svinjski filet je isfrigan na naglo...pili smo Merlot 2010e...eto van ga na bob sa manistron...daste mi dobro i beričetno...

Igor Tomljenović...The Photograph...

studiokonoba@yahoo.com (dalmacija moja inspiracija) — Sun, 06 May 2012 21:45:00 +0200

Jema dan ka se sve lipo poklopi, eto dobija san priko maila pozivnicu za otvorenje prežence litrati Igora Tomljenovića, ma pravega meštra od litrati, da van pravo rečen nisan van ja od ovaki prigoda. Pratin priko foji ko sve u Vitturiju izlaže i onda manen rukon, ma ti ča tamo izlažu bi u mnogin slučajevima tribali bit u nikoj tzv.fronti a ne u jedneme kaštelu nulte kategorije. Možda san ja malo elitaran ali virujte mi znan da nisan, eto po mome bi se tribalo vrlo selektivno ponašat ča se tiče organiziranja izložbi. Baš zato mi je drago da smo, Ona i ja, došli na otvorenje ove izložbe. Jerbo je ovo drugi par postola. Ma to van ja pišen poradi tega ča je ovod jedan nivo na kojega san navika i koji bi triba u Vituriju bit ka imperativ. Tribamo u Kaštelima doč do tega da od svi ponuda za izlaganje samo vrhunska kvaliteta bude honorirana i ti bi jemali čast da izlažu u Vitturiju. Ali dosta je sa ovin brontulavanjen ajmo se sad malo pribacit na Igorove litrate.

Prvo ča mi je upalo u oći je kolura, ta kolura me bacila na kolina, da van pravo rečen ja u mojoj kužini duperajen tamnije kolure tako da san bija taman onod di mi je i misto. Puno mi se svidija oni litrat di je par brodi u lučici od Novoga, krasna igra svitla i tame je vrhunska i nama običnin smrtnicima daje nostalgičan dojam, možda je to poradi tega ča su mi Kaštela pri srcu i nisan objektivan isto tako pokušavan razumit umjetnika ča je tija nama pokazat sa svojin tajanstvanin litratima. Svidilo mi se da je u ciloj preženci o'litrati bila samo jedan osoba, nota bene njegov sin Roko, di nan je Igor sa krasnon dijagonalon mula i žala pokaza svu lipotu ovega podnebja. Ma moga bi svaki litrat napose opisivat i sa svin čulima ga doživit ali bi onda triba napisat cili libar...eee, ma boje je ovako...svitu moj povirite u Vitturi i u miru sve pogledajte a pogotovo vazmite vrimena i guštajte jerbo ovaka prilika van se ne pruža svaki dan.

A poteštatu Berketu a i ostalima u Kaštelima koji se bave turizmon na uvo šapjen, nazovite Igora i kupite ove tajanstvene litrate i s tin oplemenite svoje otele, apartmane, marine, restorane, konobe i ča ti ga ja znan...cina je za ono ča se dobije deboto bagatela. Opremanje turistički objekata sa raznin posterima je antireklama...opremenjen sa ovin litratima se čini puno više za Kaštela vengo puste reklame koje su u mnogin slučajevima bacanje love.

ovo Ona pravi samo tako...

studiokonoba@yahoo.com (dalmacija moja inspiracija) — Thu, 03 May 2012 15:11:00 +0200

Za ovu spizu me morete probudit u sri noći jerbo je već godinan volin jist. Kuvana pašta, frigano mliveno janječe meso, špinjača na sitno, kuvano jaje u po meko...onda ovako, meso frigat i začinit onako kako van najboje odgovara. Ona doda malo šufigane kapule, češnjaka, kučarin konšerve, par grančica friškega timijana na sitno, soli i papra...

Špinjaču skuvat na brzinu i dobro je ocidit još boje dobro pritisnit da jon voda izađe vanka, prvo se poreda manistra, pa meso sa kapulon i ostalin, onda špinjača, pa jaje na fete i na kraju nagratat sira...sve to gre u ugrijanu pečnicu i nakon desetak minuti počimaju gušti...ovi put smo pili ovo vina sa Pelješca...da van pravo kažen ništa posebno eto tribali smo ga duperat, a ono na dnu čaše je bij suvenir,... ajme...nima veze jema dana kad je vino,...onako...

šparoge, divje zeje i ostalo...

studiokonoba@yahoo.com (dalmacija moja inspiracija) — Sat, 28 Apr 2012 22:46:00 +0200

Evo je granilo sunce i vrime je da se poide čagod zelenega iz našega vrtla. Kofa je u ruku i počelo je čeprkanje ispod maslina, ka san ubra zeje doda san još par lista blitve, pa malo andivije a naša san i mladi listi od cikle.

Šparoge i nikoliko bljušta san ubra za vrime jutarnje đirade po okolnin brdima. Ovi put san pofriga kunpire na sitno i priko nji meka šparoge a nji san samo dva puta okrenija.

Divji i pitomi češnjak san zajedno sa timijanon i sa dva lista friškega i jednin liston suvega lovora malo isfriga i zalija sa našin merloton i doda kučarin cukra i na kraju par kapi nektar kvasine...još san iskriža još malo kapule i karote. Zeje san skuva na brzinu i zalija sa maslinovin ujen.

Goveđi tournedos san isfriga na maslinovu uju sa bokuničen masla. Priko mesa san meka citronele i koromača koji san prvo malo okrenija u tavi. Vino za pit je bija niki viški plavac. Ma ništa posebnega tako da smo po botije ostavili za kuvanje a nastavili sa našin merloton.

đirada, litravanje i šparoge...

studiokonoba@yahoo.com (dalmacija moja inspiracija) — Wed, 25 Apr 2012 10:04:00 +0200

Ovo su mi najlipša vrimena, priroda se probudila nakon onega leda i sniga i sve blagodati ovega dila svita su mi na dohvat ruke...cviće, mediteranske trave, dalmatinski kamenjar i njezina Visost Šparoga...volimo je jist na puno načina a ne samo trdicionalno sa jajima, eto ja van volin malo pravit monade u kužini...sad nek budu ovod samo ovi litrati a o ricetama ču drugi put...

kamena kuća, sređujen krov...

studiokonoba@yahoo.com (dalmacija moja inspiracija) — Sun, 22 Apr 2012 09:58:00 +0200

Prije nego se počme unutra sređivat vaja ove kamene ploče primazat sa vodonepropusnin cimenton...prvo san sve sa bruškinon ostruga i pomeja...onda san primaza sa SN vezon i nakon tega dvi ruke ovega ajmo ga nazvat cimenta, ma u njemu jema i lipila i ko zna čega još...a zanja ruka če bit malo gušče i sa tin ču zatvorit sve buže tako da ne ulazi vlaga a i beštije...ovo je bilo malo riskantan posal vajalo se vezat konopon oko pasa i drugin krajen konopa za susidovu ogradu...nikad se nezna...a doli u prizemju još uvik tučen stari betonski pod i vadin lipe kamene ploče, one če bit oprane i ka sve bude doli pri kraju onda jeman jednega prvoklasnega meštra koji če i poslagat i fugirat...za sad gre dobro, eto nadan seda če sve do kraja ove godine bit sređeno i onda početkon 2013te počima opremanje i dekoriranje...da bi sve do lita bilo gotovo za turističko fitavanje...

lagani obid...

studiokonoba@yahoo.com (dalmacija moja inspiracija) — Thu, 19 Apr 2012 00:20:00 +0200

Juva je bila samo taka,ovi lipi bokuniči govedine u juvi su nan lipo legli. Od tega se more napravit fini bouillon uz malo karote i na sitno rizanoga zelenilo o'kapule. To nan je bilo za početak. A kasnije smo poili bokunič bifteka koji je bija frigan i zaliven sa pinkicu ovega Španjolskega vina. Bilo je domači njoki, gratanega sira sa malo karote ča je ostalo od juve. Lagane čakule o svemu i ničemu su nan ulipšale dan, eto ka si deboto penšjunat onda pišeš ovake pizdarije na blogu. Ajde daste mi dobro i beričetno nama je bilo super.

priprema sadnica o'verdure...

studiokonoba@yahoo.com (dalmacija moja inspiracija) — Sun, 15 Apr 2012 21:31:00 +0200

Evo je došlo vrime da se sadnice verdure iz zimskega vrtla posadidu vanka. Ma jema san problema sa jednin dosadnin puhom koji mi je jia mladice, ali san ga uvatija na trapulu a onda je i zaladilo tako da su u zimskeme vrtlu bili temperaturni šokovi ma znate, ka je bilo sunce onda je bija pakal a noću bi bilo ledeno i sve mi se poprilično poremetilo.

Ajde sa se stanje smirilo i uskoro gren na prisađivanje u vrtal. Od ove godine če bit i verdure u zimskem vrtlu i to ovako, vazmen jednu prozirnu plastičnu vriču naspen dil pilotine i priko tega dila dodan zemje i jedan dil nek ostane za smotavanje, onda se nalije vode priko zemje tako da pilotina bude pod vodon, posadin ajmo reć pomidoru u zemju pa onda smotan ostatak vriće tako da samo prisadnica viri vanka, vazmen kurdelu i dobro smotan okolo grla o'plastike tako da samo prisadnica viri vanka.

Tu vriću meknen na sunčano misto i ako triba potakjan je oli pripremin kurdelu da se poma more penjat i vezivat, prednost ovega naćina sadnje je da vodu ne triba često dodavat jerbo se voda kod isparavanja kondenzira na grlu o'plastične vriće i ta se voda vrača nazad na zemju, triba ipak vodit računa da če kroz grlo uteč vanka malo vode poradi ishlapjivanja, zato triba kontrolirat i koji put malo zalivat kroz grlo uz stabjiku. Ovo je interesantno za jude koji žividu u gradu i jemaju balkon oli lođu, na ovaki naćin uzgajaju svoju verduru. A prikladno je i kad jemaš vikendicu to pet dan more durat i ka se u vikendu dođe doda se malo vode tako je uvik dosta verdure za ubrat. Uskoro ču meknit fotke da se vidi kako to pari za vidit.